زيروه لر يولچوسو

گونتای گنجالپ

زيروه لر يولچوسو

         تبريزده هر کسين سايقي دويدوغو، دونيانين بير چوخ هوندور داغلارينا يوکسلميش اونلو داغچي حوسئين حراستي  هر طرفي قارلا ساريلميش پامیرین ان اوجا زيروه سيني فتح ائتمک ايسترکن،  دوشرک حياتيني ايتيرميشدير...

1-    اؤزگور روح

         ووجودونون درينليگيندن گلن بير سس اونو بليرسيزلييه، سونسوزلوغا چاغيريردي. باشلانغيجي و سونو گؤرونمه ين يوللار اونون ايچينده بير-بيرينه دولاشميش، روحونا ساريلميشدي. 

  داغلارين بوينونا ساريلا-ساريلا زيروه يه ديرماشان سرت کئچيدلي يوللارين سيرلي چاغريشلاري رؤيالارينا، يوخوسونا گيريردي. داغلار، اولو روحو داريسقالليقدان قورتارما گؤرَوی ايله يوکلنميشدي. داغ باشيندان سئل اولوب آخيشان جاذيبه لر روحونو ايشغال ائتميشدي. 

  عشق، قوتسالجا ايشغال اولونما دئمکدير. عشق، باغلاناراق اؤزگورلويه اولاشماقدير. هر کس اؤز ميقدارينجا سئور؛ بيري آبي حياتي (ديريليک سويونو)، بيري سئوگيليني، بيري ده … 

   “هر کسين عالمده ميقدارينجادير تب`ينده مئيل 

   من لبي جانانيمي، خيزر آبي هئيوانين سئور” (فوضولي)

  سئوگي، اونونلا ياشاماق و اونسوز ياشايا بيلمه مکدير. داغلارسيز ياشايا بيلميردي. سئوگي، روحون اؤزگورلويه اوزانان يولودور. ايچه ريدن دومانليغي، قارانليغي و آنلاشيلمازليغي دفع ائدن، روحو اينانجلا اؤزدئشلشديريب، اومودلارا، موتلولوقلارا قوووشدوران سئوگيدير. داغلارين جاذيبه سي ووجودونا دولموش، اونو سيغمازليق بيلينجينه ارديرميشدي. قلبيندن بئينينه عشق ايلديريمي چاخميشدي. بئينينده حئيرت دوغوران سيرلر گؤرونموشدو. باشيندا داغ هاواسي وار ايدي. دوشلرينده (خیاللاریندا) داغلار دولاشيردي. داغلار اؤز آرخاداشيني، اؤزگور روحو چاغيريردي.

2-    حرکت

  اؤزگور و موتلو روح دره نين ديبيندن باشي قارلي زيروه يه باخدي. گونش زيروه ده دورموش، ايشينلاري اؤزگور روحو، کؤلگه لي، درين و دالغين دره لردن همن زيروه يه دوغرو يوکسلمه يه چاغيريردي. گؤيلرده داغينيق بیاض بولودلار اؤزگور روحون سئودالي ايراده سينه حئيرت ائديردي.   

  قاياليقلار فتح ائديلديکجه يوکسکليکلرده ياشاماق عشقي يورغونلوغونو اونوتدوروردو. زيروه يه دوغرو يوکسلديکجه، اؤز ايچينده ده يوکسه ليردي. يوکسه ليش بير روح حاليدير. او روح حالي اينسان وارليغيندا حرکته کئچمزسه، داغلاري فتح ائتمک، زيروه لره يوکسلمک مومکون اولماز. اينسانين ايچ دونياسيني گئنيشله دن يوکسه ليش دويغوسودور. ايچينده يوکسکليک دويغوسو داشييانلار دايما داغلارا وارميشلار، داغلار دا اونلاري چاغيرميشدير، چاغيراجاقدير. 

  کئچيلمز يارغانا، اوچوروما راستلاندي. ديرناقلاري سويولموشدو، آنجاق آغري حيسس ائتميردي. اولو ايستک و يوکسک هدف اوغروندا مرکزلشن ايراده کيچيک آغريلاري دويولماز ائتميشدي. گئرييه دؤنوب باخدي، دره لرين ديبي گؤرونموردو. “درينليکلره باخمازلار” کيمي بير سؤز ائشيتميشدي، چونکو درينليکلرين جاذيبه سي وار. درينليکلر گؤزو آخيدار، درينليکلر جذب ائدر.   

  درينليکلر اونو جذب ائتمه دي، ائده بيلمه دي، چونکو اونون روحوندا يالنيز يوکسکليکلرين جاذيبه سي وار ايدي. زيروه يه يوکسه ليش ايراده سي دره لرين جاذيبه سيندن اوستون ايدي. 

  بير آز کناردا، بؤيوک قايانين اوستونده اوتورموش بير قارتال سسسيزجه اونون ديرمانيشينا باخيردي. اؤزگور روحون گؤزو قارتالا ساتاشدي و:

  “زيروه يه گئديرم، بير آز سرتليکله راستلانميشام، آنجاق کئچه جه یم” - دئدي. 

  قارتال اوزون-اوزون اونو سئير ائتدي، سونرا دا قييها چکيب اؤزونو اوچوشا توللادي. زيروه لر يولچوسو قايادان ساللاق حالدا قارتالين اوچوشونو سئير ائديردي.  

  سويولموش ديرناقلاري نين قاني قوللاريندان بوينونا طرف آخيردي. داغداغان کولوندان ياپيشيب اوچورومو کئچدي. دينجيني آلماق اوچون آزجيق اوتوروب، بير ماهني زومزومه ائتمه يه باشلادي:

                             بير سئودايا کؤنول وئرديم، 

                             آلدي، آپاردي روحومو. 

                             دولاشديردي دونيالاري، 

                             داغلارا وئردي کؤنلومو.

***

                             عشق ايچيمده چاغلار منيم، 

                             بو کئچيلمز يوللار منيم، 

                             اسکي دوستوم داغلار منيم، 

                             آلدي، آپاردي روحومو. 

***

                             داغلارداکي گيزلين گيزلر، 

                             اؤزگور روحلاري هپ ايزلر، 

                             اؤزله ديگيم گيزلي ايزلر، 

                             آلدي، آپاردي روحومو. 

3-    زيروه ده

  زيروه لر سونسوز گؤيلره ان ياخين مکاندير. زيروه لرين ووقاري، اونون سويونون، کؤکونون يئرين ان درينليکلرينده اولماسي اوزوندندير. زيروه لر سويلودورلار. زيروه لر و زيروه لره يوکسلنلر. زيروه لره يوکسلنلر زيروه نين ائحتيشامي، ووقاري ايله اؤزدئشله شيرلر. 

  ايچ دونياسي نين درينليگي، سويلولوغو ايله کايناتين سونسوزلوغونو بيرلشديرن زيروه لر يولچوسو، سونسوز بير موتلولوق ايچه ريسينده “زيروه لر” آديندا بير شرقي سؤيله ييردي:

                   موقدس مکاندير، موقدس مکان، 

                   يوکسه ليش معناسين آنديرير هر آن، 

                   يئرين ايچ قاتيندا کؤک سالديغيندان، 

                   هر زامان جاواندير قوجا زيروه لر. 

***

                   گئجه لر اولدوزلا، آيلا گؤروشر، 

                   گوندوز گؤيلر قيزي گونله اؤپوشر، 

                   سئوينجي دره ئيله، دوزله بؤلوشر، 

                  داغلارين باش تاجي هاچا زيروه لر. 

***

                  قاپ-قارا بولودلار سيخلاشان زامان، 

                  شيمشکلر غضبين دويدو ياخيندان، 

                  دوزلري، چؤللري ساراندا دومان، 

                  ساچينا دن دوشن اوجا زيروه لر. 

  ايلديريملارين غضبي ايله ايچ-ايچه اولاراق برکييَن و يوکسلن زيروه لر. زيروه يئر دئييلدير، گؤيون آلتيدير. زيروه لردن يوکسکده دوران گؤيلردير. گؤيلرين سيرلريني دويما آشاماسيدير زيروه لر. 

  گؤيلرده بیاض بولودلارین يئريني آلان بوز بولودلار بير-بيرينه دوغرو سورونوردو. بولودلارين کينلي، غضبلي و ايلديريم دوغوران سورتوشمه لري باشلاميشدي. زيروه لي داغين بئلي نين اورتاسينا بير نئچه قورخونج سسلي ايلديريم شيغيدي. داغين بئلي قیریلمادی، آنجاق اوزون ايللر بويونجا زيروه لرده اوست-اوسته قالانيب برکيين قارين و قار بوزلاري نين بئلي قيريلدي. چيغ (بهمن) گورهاگورلا ديبي گؤرونمه ين دره لره دوغرو يووارلانيردي.  

  زيروه لر يولچوسونون آياغي سوروشدو و چيغلا بير يئرده دره نين ديبينه يووارلاندي… 

  بوغازينا قدر قارين آلتيندا قالميش زيروه لر يولچوسونون سؤنمکده، قاپانماقدا اولان گؤزلري زيروه يه ديکيلميشدي، بير آز اؤنجه فتح ائتديگي زيروه يه. توفاندان سونرا هر طرفي سارميش بياض سسسيزليک ايچريسيندن داغلار بير پيچيلتي دويدو:

      بدنيمي ترک ائدن روح، 

      دره لرده توتما قرار، 

      مندن آيريليب گئدن روح، 

      يوکسل، اوردا، زيروه ده قال!  

  *** 

  زيروه لر يولچوسونون سون نفه سي زيروه يه دوغرو دومانلانيردي… 

باکی- 2002