صمد بئهرنگی
قاراجا باليق
چئويرن: گونتاي گنجالپ
ترجومه چيدن اؤنسؤز
صمد بئهرنگي دونیا ادبیاتیندا تانيش و دوغما بير آددير. اوزانلار، شاعيرلر اونون حاققيندا بوللوجا شعر يازميش، موسيقيده سسلنديرميشلر. بئهرنگي قدر ميللي اخلاقلا، ميللي معنويياتلا قايناييب- قاريشان شخصييت بلکه ده عومومييتله هئچ يوخدور. صمد بئهرنگي نين اسرارانگيز اؤلومو ده چوخ ماراقلي بير يئرده گئرچکلشميشدي: آراز چاييندا. آراز چايي آذربايجان ادبيياتيندا نيسگيلين، آيريليغين سيمگه سي کيمي آنلاشيلميش، آنلاديلميشدير. صمد بئهرنگي کيمي گنج بير يازارين آرازدا اؤلدورولمه سي آذربايجان ادبي موحيطي نين دويغوسال قاوراييشيني داها دا دريندن ائتکيله ميشدير. صمد بئهرنگي نين ياشاديغي تاريخده ميللي مسئله ني اؤن پلانا چکن تشکيلات و يا فردلر چوخ آز ايدي. او زامانلار مارکسيست، ايسلام دئوريمجيسي اولماق يايقين ايدي. بئهرنگي نين ان ياخين دوستلاري مارکسيست اولدوقلاري اوچون ياخالانيب اؤلدورولدولر. اصلینده آذربايجان تورکلری ايسلامچي و مارکسيست-لئنينيست ايدئولوژيلردن چوخ ضرر گؤرموشدور. ان فداکار و جسور گنجلريميز بو منفور ايدئولوژيلر يولوندا حياتلاريني ايتيرديلر. آنجاق هر زامان بؤيوک شخصييتلر تاريخي قاباخلايا بيلميشلر. او زامان صمد بئهرنگي هئچ بير «اينقيلابي» ايدئولوژییه قاتيلمادان ياراديجيليقلا مشغول اولدو و آذربايجان ميللي ايستکلريني ديله گتيردي. او زامان ميللي مسئله ايله مشغول اولماق داها تهلوکه لي ايدي. ندن؟ چونکو بئهرنگي نين زامانيندا 21 آذر حاديثه سي نين خاطيره لري هله جانلي ايدي. 21 آذرده اؤلدورولن سايسيز اينسانلارين اوغوللاري، قارداشلاري، باجيلاري، نوه لري هله ياسدان تام اولاراق چيخماميشديلار. بو اوزدن ده فارس شووينيزمي و پهلوي ايستيبدادي اوچون آذربايجان ميللي مسئله سي هر شئيدن تهلوکه لي ايدي. و صمد بئهرنگي بئله تهلوکه لي بير ايشله مشغول ايدي.
بئهرنگي کند- کند، اوبا-اوبا دولاشيب ياشلي قادينلاردان و کيشيلردن دينله ديگي خالق ناغيللاريني کيتابلاشديردي. بو، ائله ايجتيماعي بير اورتامدا باش وئريردي کي، فارس شووينيزمي تورکلرین بوتون دَيَرلري نين ميللي خاطيره لردن سيلينمه سي اوچون دؤولت ايمکانلاريني سفربر ائتميشدي. مکتبلرده آنا ديلينده دانيشان چوجوقلاري، موعليملري جزالانديريرديلار. بوتون بو چتين دوروما قارشي بئهرنگي ميللي کيمليگين يوکسلمه سي اوچون اينتئللئکتوال ساهه ده فعاليت گؤستريردي. سووئتلر بيرليگي ايچينده نيسبي اولاراق آنا ديلينده يازيب-اوخوماقدان برخوردار اولان قوزئي آذربايجانداکي ادبي دَيَرلري گونئي آذربايجاندا تانيديردي. بو ايستک دوغرولتوسوندا بئهرنگي «پارا-پارا» آديندا بير کيتاب يايينلادي. کيتابين آدي چوخ آنلاملي ايدي. بوراداکي «پارا-پارا» سؤزو، دولاييسييلا پارا-پارا بؤلونموش، پارچالانميش آذربايجانا ايشاره ائديردي. کيتابدا قوزئي و گونئي شاعيرلري نين شئيرلريندن اؤرنکلر وئريلميشدي. بئهرنگي اؤلدورولدوکدن سونرا اونون اثرلرينه اولان ايستک شيددتلندي. بو شيددتلي ايستک ايستر-ايسته مز اونون ميللي کيمليک گؤروشونون ده اؤزومسنمه سينه سبب اولوردو. حتّی بو گون ده ميللي کيمليگيميزين يوکسه ليشينده صمد بئهرنگي نين کيتابلاري نين چوخ بؤيوک ائتکيسي وار. سادجه اونون اثرلري نين ائتکيسي دئييل، " صمد بئهرنگي " آدي اؤزو-اؤزلوگونده ميللي موباريزه ني چاغريشديرير.
بئهرنگي بير چوخ اثر يازميش. هله ليک اونون «قاراجا باليق» کيتابيني ترجومه ائديب اوخوجولارا سونورام. ندن بو ترجومه يه احتيياج دويدوم؟ باکيدا ياشاديغيم زامان 4 ايل آتاتورک ليسه سينده اؤيرَتمنليک ائتديم. آنا ديليندن درس کئچيرديم. سانيرام 5- جی صينيفين درسليگينه «قاراجا باليق»ي دا سالميشديلار. چوخ قوصورلو و حتّی يانليش و خطالي ترجومه ائديلميش، بئهرنگي نين بعضي گؤروشلري ده تحريف ائديلميشدي. بو اوزدن ده او زامان بو کيتابي گونئيدن گتيرديب ترجومه ائتديم. اؤز ترجومه مي اوشاقلارا اوخودوم. هئچ واخت اونوتمارام کي، ائله هيجانلا اوخوموشدوم بو اثري کي، تنففوس زنگي نين چالماسينا باخماياراق اوشاقلار اوتوروب دينله مگي ترجيه ائتديلر. کيتابداکي باليق تيمثاليندا رمزلشديريلن قهرمانليقدان هاميسي نين توکلري بيز- بيز اولموشدو.
منجه بئهرنگي نين شاه اثري ائله بو کيتابدير. يقين کي، ياشاسا ايدي، داها بؤيوک اثرلر ياراداجاقدي. «قاراجا باليق» حقيقتي، سونسوزلوغو و روحي بوتونلوگو آختاران بير اينساني خاطيرلادير. بو يولداکي موباريزه ده تجروبه قازانيب اولقونلاشان، ماجرادان ماجرايا آتيلان، بير آن بئله دوغرونو آراماقدان واز کئچمه يهن بير اينسان. قارشيسينا تورلو- تورلو جهالت چيخير، حياتيني محو ائدن وحشيلرله قارشيلاشير قاراجا باليق. آنجاق حيات دوغرونو اؤيرنمه يه حصر ائديلميرسه، اونون نه آنلامي وار. حياتا آنلام وئرن حرکتدير. چونکو حرکت ائدرکن تجروبه قازانيلير، يئني هدفلر اورتايا چيخير. بئهرنگي چوخ گؤزل تثبيت ائتميش بونو کي، بؤيوک آماج يولوندا سفره چيخارکن، قورخو حيسسي اؤز-اؤزونه يوخ اولور. قورخو حيسسي داها چوخ دورغونلوغون و ذهنين اؤز قارانليغيندا، اؤز دومانليغندا بوغولماسي نين نتيجه سيدير. اوزاق يوللارين يولچوسو اولماقلا، بؤيوک هدفلري نفسده اؤزدئشلشديرمکله قورخو دويغوسوندان قورتولماق مومکوندور. يولچولوق زاماني قورخو فاکتورلاري ايله موباريزه باشلايير و قورخونو يارادان انگللر اورتادان قالديريلير. نئجه کي، قاراجا باليق اؤز قيلينجي ايله باليق اودان قوشو، باليقلاري يئين ناققاني ايچلريندن وورور. اؤز قيلينجي ايله اونلارين قارنيني ييرتيب و باليقلارين حياتيني تهلوکه دن قورتارير. هامي قهرمان اولماز. قهرمانليق اوچون هونر و خاراکتئر لازيمدير. بير قهرمانين، بير فيکير آدامينین حسابينا بير ميلت و بير توپلولوق آزادليغيني الده ائدير. بئله ليکله ده گئرچک حيات هم ده باشقالاري اوچون ياشاماقلا، باشقالارينا آزادليق و سعادت گتيرمکله و اساسن ده اوستون و ياراديجي بير کيمليیه قوووشماقلا آنلام قازانير. بئهرنگي «قاراجا باليق» کيتابيندا بو اخلاق آنلاييشيني، بو اخلاق فلسفه سيني ميلته آنلادير، شرح ائدير. کيچيک حجملي بو کيتابدا بؤيوک فيکيرلر و سيرلر يئرلشميشدير. جمعييتين، اؤزلليکله گنجليگين بؤيوک ايدئاللارينا و ياراديجيليق ايستکلرينه قارشي چوروک اسکي دَيَرلرين نئجه ده مانع اولدوغو آنلاديلير. نيچه´ نين فلسفه سي چوخ ساده ديلله ايضاح ائديلير. نيچه´يه گؤره اوچ نؤوع خاراکتئر وار: 1. اخلاقي و يا جمعييتين اسکيدن قالان دَيَرلري ايله راضيلاشيب حياتيني چورودن اينسان تيپي. چوغونلوغو تشکيل ائدن بو تيپلر هر نؤوع يئنيلييه و دَييشيمه قارشيدير. بونلار اسکي دَيَرلرين اخلاق آنلاييشيني مقبول ساييرلار. جهالتده ياشاماق آيدينليقدا و بيلگينليکده ياشاماقدان داها راحاتدير. تنبللرين ترجيحي جهالتدير. 2. اؤزگور اينسان تيپي. بو تيپلر جمعييتين اخلاق آنلاييشيني قبول ائتمزلر، آنجاق يئني دَيَرلر و يئني اخلاق آنلاييشي ياراداجاق دوزئيده ده دئييللر. 3. اوستون اينسان تيپي. بو نؤوع اينسانلار اسکي دَيَرلري قبول ائتمه مکله يئتينمزلر. اونلار هم ده اسکي دَيَرلري اورتادان قالديريب يئني دَيَرلرين ياراديجيسي کيمي مئيدانا چيخارلار. مثلن آتاتورک مين ايلليک عوثمانلي-ايسلام دَيَرلريني اورتادان قالديريب يئني اخلاق آنلاييشي، يئني حيات آنلاييشيني قوردو. صمد بئهرنگي نين «قاراجا باليق» اثرينده هر اوچ اينسان تيپي ايله قارشيلاشيريق. قاراجا باليق اسکي دَيَرلري ردد ائتديگي اوچون موحافيظه کار دسته اونا قارشي چيخير و حتّی اسکي دَيَرلرين قورونماسي اوچون قاراجا باليغي اؤلدورمک ايسته ييرلر (بونلار اخلاقي دسته دير). بير دسته ايسه قاراجا باليغي دستکله يير، موحافيظه کارلارين حيات طرزينه قارشي چيخيرلار، لاکين بو دسته ده موحافيظه کارلارين دَيَرلريني اورتادان قالديريب و يئني دَيَرلر اورتايا قوياجاق بيلگي و جسارت يوخدور (اؤزگور دسته). قاراجا باليق ايسه بير جسارت و دوشونجه اؤندري کيمي مئيدانا چيخير. بوتون تهديدلره سينه گره رک، يئني دونيا دوزه ني قورماق ايسته يير و باشارير (اوستون و ياراديجي کيمليک). قاراجا باليق بوتون انگللري اورتادان قالديريب، دار معنوي موحيطدن قورتولدوقدان و دنيزه قوووشدوقدان سونرا اؤلوم - حيات حاققيندا يئني دوشونجه لر سؤيله يير: «اؤلوم هر آن مني ياخالايا بيلر. آنجاق من باشارديغيم قدر ياشامالي، اؤلومدن قاچمالييام. آنجاق اؤلومله قارشيلاشا دا بيلرم. اؤنملي دئييل، اؤنملي اولان بودور کي، منيم حياتيم و يا اؤلوموم باشقالاري نين حياتينا نئجه تاثير گؤستره جکدير.» بو دوشونجه اوستون کيمليگي اؤز ايراده سي و موباريزه سي ايله قازانميش بير ذهنييتين اولا بيلر يالنيز. و قاراجا باليق دا اؤزگورلوگو اؤز دار قارانليق موحيطينده دئييل، دئنيز گئنيشليگينده قازانير.
سانکي قاراجا باليق حقيقتي آختارماق اوچون هر شئيدن ايمتيناع ائديب يوللارا دوشن و اؤز روحوندا سفره باشلايان بوددا پئيقمبرين سرگوزشتيدير. سانکي حياتيني بوتونو ايله بيلگييه حصر ائدن و دايما آختاريشدا اولان شمسي- تبريزي نين حيات شکليدير. سانکي بو کيتاب منيم اوچون يازيلميش. نه قدر ده اؤز حياتيملا «قاراجا باليق» آراسيندا بنزرليک وار. بو اوزدن ده بئهرنگي نين اثرلريني چوجوقلوق ياشلاريمدان باشلاياراق دؤنه-دؤنه اوخودوم و منيم ميللي موباريزه يه، فيکير آختاريشينا قاتيلمامدا ائتکيسي اولان اردملي کيشيلردن بيري ده صمد بئهرنگيدير. صمد بئهرنگي موعليم ايدي. يئنه ده موعليمدير و ابديين ده بو ميلتين موعليمي اولاراق قالاجاقدير. من بؤيوک بير غورور حيسسي ايله دئييرم کي، منيم دوشونجه مين، ميللي دويغولاريمين موعليملريندن بيريسي ده صمد بئهرنگيدير. بو اوزدن ده بو کيتابين ترجومه سي شاگيردين اؤز موعليمينه اولان تؤحفه سي کيمي آنلاشيلماليدير. سون اولاراق يئنه ده بو کيتابين ترجومه سيني صمد بئهرنگي نين شاگيردلرينه تقديم ائديرم. بو گون اونلارين چوخو تورکلویون ميللي ايستکلري يولوندا موباريزه آپارديقلاري اوچون ايسلامين قارانليق زيندانينا آتيلميشلار. بو ترجومه ني سيزلره سونورام منيم محبوس باجيلاريم، قارداشلاريم.
گونتاي گنجالپ
15.06.08
فينلادييا
قاراجا باليق
چيله گئجه سي ايدي. قوجا باليق دنيزين ديبينده اون ايکي مين نوه- نتيجه سيني اطرافينا ييغيب ناغيل دئييردي:
بيري وار ايدي، بيري يوخ ايدي. بير قاراجا باليق وار ايدي. بو قاراجا باليق آناسي ايله برابر کيچيک بير آرخدا ياشاييردي. آرخين سويو سال قايالاردان چيخيب دره نين درينليگينه آخيردي.
قاراجا باليغين و آناسي نين ائوجيگي خزه لرين آلتيندا بير قارا داشين آرخاسيندا يئرلشميشدي. گئجه لر آنا- بالا بير يئرده خزه لرين آلتيندا ياتيرديلار. قاراجا قارا باليق آيي ائولري نين ايچينده گؤرمک ايسته ييردي. آنجاق بو آرزوسونا چاتا بيلميردي. قاراجا باليق آيي ائولري نين ايچينده گؤرمه حصرتي ايله يانيب- ياخيليردي. آنا- بالا سحردن آخشاما قدر بير- بيري نين آرخاسينجا دولانير و بعضن ده باشقا باليقلارا قاتيليب کيچيک بير يئرده گزيشيرديلر.
قاراجا باليق آناسي نين بيريجيک ائولادي ايدي. چونکو اون مين توخومدان يالنيز قاراجا باليق ساغلام دونيايا گلميشدي.
بير نئچه گون ايدي قاراجا باليق دالغين، فيکيرلي گؤرونور، چوخ آز دانيشيردي. مئيلسيزجه او يان بو يانا گئدير، چوخ واختلار دا آناسيندان گئري قاليردي.
آنا فيکيرلشيردي: «بالاسي نين نسه بير خسته ليگي وار کي، تئزليکله کچر گئدر.» سن دئمه قاراجا باليغين دردي باشقا ايميش! بير گون سحر تئزدن قاراجا باليق آناسيني يوخودان اوياديب دئدي: آنا، سنينله بير نئچه کلمه دانيشماق ايسته ييرم.
آناسي يوخولو- يوخولو دئدي: آي بالا، دانيشماغا واخت تاپميسان! سؤزونو ساخلا سونرايا. ايندي گزييه چيخماق زامانيدير.
قاراجا باليق دئدي: يوخ آنا، من آرتيق بو گزييه قاتيلا بيلمه يه جه یم. من بوردان گئتمه لييم.
آنا دئدي: موطلق گئتمه ليسن؟
قاراجا باليق دئدي: هه، آنا جان، موطلق گئتمه لييم.
آنا دئدي: سحر تئزدن هارا گئتمک ايسته ييرسن؟
قاراجا باليق دئدي: ايسته ييرم گئديب بو آرخين سونونو تاپام. بيليرسنمي آنا جان، آيلاردير فيکيرلشيرم کي، بو آرخين سونو هارادير، آنجاق هله هئچ بير شئي آنلايا بيلمه ميشم. کئچن گئجه دن بو آنادَک گؤزلريمه يوخو گيرمه ييب، بوتون گئجه بويو فيکيرلشميشم. سونوندا کسين قرارا گلديم کي، يولا دوشوب گئديب بو آرخين سونونو تاپمالييام. بيلمک ايسته ييرم باشقا يئرلرده نه لر وار.
آنا گولومسيه رک دئدي: من ده اوشاق ايکن بئله خياللارا چوخ دالميشديم. آنجاق بالا، آرخين باشلانغيجي سونو اولماز. ائله گؤردويون کيمي آرخ هر زامان آخار. آخار و هئچ يئره ده چاتماز.
قاراجا باليق دئدي: آنا جان، دونيادا هر شئيين سونو يوخدور مو؟ گئجه نين سونو وار، گوندوزون سونو وار؛ هفته، آي، ايل...
آنا اونون سؤزلريني کسه رک دئدي: آغزينا سيغمايان بو سؤزلري قوي بير يانا، قالخ گئدک گزييه. گزمک واختيدير.
قاراجا باليق قطعي بير سسله دئدي: يوخ آنا، من آرتيق بو گزيلردن بئزميشم. من گئتمک ايسته ييرم. يقين فيکيرلشه جکسن بو سؤزلري منه کيمسه اؤيرتميش. ائله دئييل آنا جان، من چوخداندير بو فيکيرده يم. آنجاق باشقالاريندان دا چوخ شئيلر اؤيرنميشم. مثلن گؤرموشم کي، بير چوخ باليقلار ياشلانديقدان سونرا گيلئيله نيرلر کي عؤمورلريني معناسيز کئچيرميش، چوروموشلر. بيلمک ايسته ييرم کي، دوغرودان مي ياشاييش ائله داريسقال بير موحيطده چابالاييب ياشلانماقدير، يوخسا باشقا تورده ياشاماق مومکوندور؟
قاراجا باليغين سؤزلري بيتديکدن سونرا آناسي دئدي: آي بالا، عاغليني مي ايتيرميسن؟ دونيا...دونيا! دونيا نه دئمکدير؟ دونيا بيزيم ياشاديغيميز يئر و حيات دا ائله بوندان عيبارتدير.
بو آندا يئکه بير باليق اونلارين ائوينه طرف ياخينلاشاراق دئدي: قونشو، نه اولوبدور؟ اوشاغينلا دالاشيرسان دئيه سن. سانکي بو گون گزييه چيخماق فيکرينيز يوخدور!
قاراجا باليغين آناسي قونشونون سسيني ائشيدر-ائشيتمز ديشارييا چيخيب دئدي: آي قونشو، گؤر نه پيس زامان اولموش! اوشاقلار آنالارينا نه سه اؤيرتمک ايسته ييرلر!
قونشو دئدي: نه اولوب کي؟
آنا دئدي: بونا بير باخ سن، بير هوللوک بويو ايله گؤر هارالارا گئتمک ايسته يير! ائله هئي دئيير گئديب دونياني گزمک ايسته ييرم، بئله ده ايش اولار؟
قونشو دئدي: بالا، سؤيله گؤروم سن نه زاماندان بري عاليم و فيلوسوف اولموسان کي، بيزيم خبريميز اولمايب؟
قاراجا باليق دئدي: " خانيم، من بيلميرم سيز عاليم و فيلوسوف نه يه دئييرسينيز. من سادجه بو گزينتيلردن بئزميشم و بو بئزيکديريجي ياشاييشا سون وئرمک ايسته ييرم. ايستميرم نه زامانسا بير دفعه آييليب گؤرم کي، سيزين کيمي ياشلانميش بير باليغا دؤنموشم و دونيا حاققيندا دا هئچ بير آنلاييشيم يوخدور.
قونشو دئدي: واي واي! نه قورخونج سؤزلر!
آنا دئدي: هئچ عاغليما گلمزدي کي، منيم بو بيريجيک ياوروم بئله اولاجاقميش. گؤره سن هانسي خبيث بالامي يولدان چيخارميش؟
قاراجا باليق دئدي: کيمسه مني يولدان چيخارماييب. منيم عاغليم وار درک ائديرم و گؤزلريم وار گؤرورم...
قونشو، قاراجا باليغين آناسينا دئدي: آي باجي، او حلزونو خاطيرلاييرسانمي؟
آنا دئدي: هه، ياخشي خاطيرلاييرام، ياخشي دئدين. بالاملا چوخ صؤحبتله شيب پيچيلداشيردي. تانري اونون باشينا مين بلا گتيرسين، ياورومو او، يولدان چيخاريب.
قاراجا باليق دئدي: يئتر آنا جان! او، منيم دوستوم ايدی.
آنا دئدي: باليقلا حلزونون دوستلوغونو هئچ دويماميشديق.
قاراجا باليق دئدي: من ده باليقلا هلزونون دوشمنليگيني هئچ دويماميشديم. آنجاق سيز او يازيق هلزونا چوخ پيس داوراندينيز.
قونشو دئدي: بو آرتيق کئچميشين صؤحبتيدير.
قاراجا باليق دئدي: سيز اؤزونوز کئچميشدن سؤز آچدينيز.
آنا دئدي: اصلینده اونو اؤلدورمه لي ايديک. خاطيرلاييرسانمي اوردا-بوردا نه لر دانيشيردي؟
قاراجا باليق دئدي: او زامان مني ده اؤلدورون، چونکو من ده عئيني فيکيرلري سؤيله ييرم. نه باشينيزي آغريديم، سس- کويه باشقا باليقلار دا ييغيشيب گلديلر. قاراجا باليغين سؤزلري هر کسي سينيرلنديرميشدي.
ياشلي باليقلاردان بيري دئدي: ائله بيليرسن سنه رحم ائده جه یيک؟
باشقاسي دئدي: سادجه اونا بير قولاق بورماسي وئرمه لي یيک.
قاراجا باليغين آناسي دئدي: چکيلين کنارا، بالاما توخونمايين.
باليقلارين ايچيندن بيري دئدي: خانيم، ائولاديني لازيمينجا تربييه ائتمه ميسن، ايندي ده جزاسيني چکيرسن.
قونشو دئدي: اينانين، سيزينله قونشو اولماغيما اوتانيرام.
باشقا باليق دئدي: ايش بؤيومه ميش گلين بونون باشينا حلزونون باشينا گتيرديگيميزي گتيرک.
باليقلار قاراجا باليغا هوجوم ائدرکن، قاراجا باليغين آرخاداشلاري اونو احاطه لرينه آليب اوردان اوزاقلاشديرديلار.
قاراجا باليغين آناسي آغلايا-آغلايا باشينا دؤيوب دئييردي: آي آمان... باشيما هارانين کولون تؤکوم، بالام الدن گئدير...
قاراجا باليق دئدي: آنا، منيم حاليما آغلاما، بو ياشلانميش، عؤمورلريني ايتيرميش بدبخت باليقلارين حالينا آغلا!
باليقلاردان بيريسي اوزاقدان باغيردي: بيزي تحقير ائله مه آخماق.
ايکينجيسي دئدي: اگر گئديب پئشمان اولوب گئري دؤنسن، آرتيق سني ايچريميزه بوراخماياجاغيق.
اوچونجوسو دئدي: بوتون بونلار گنجليک دئوري نين هوسلريدير، گئتمه!
دؤردونجوسو دئدي: سؤيله گؤرک بورانين نيي پيسدير، نييه گئديرسن؟
بئشينجيسي دئدي: باشقا بير دونيا يوخدور، دونيا يالنيز اولدوغوموز يئردن عيبارتدير. شئيطانين داشيني تؤک اتگيندن، گئتمه!
آلتينجيسي دئدي: بيز سني گؤرمه يه عادت ائتميشيک، سنسيز داريخاريق...
آنا دئدي: منه يازيغين گلسين، گئتمه... گئتمه!
قاراجا باليق آرتيق بو سؤيلننلرين هئچ بيريسيني دينله ميردي. تاي- توش دوستلاريندان بير نئچه سي اونو يولا سالماق اوچون قاراجا باليقلا چاغلايانا (شلاله یه) قدر گلديلر.
قاراجا باليق دوستلاريندان آيريلارکن دئدي: آرخاداشلار، گؤروشمک اومودو ايله سيزدن آيريليرام. مني اونوتمايين!
دوستلار دئديلر: قاراجا بالیق، سني هئچ اونوتماق اولارمی؟ سن بيزي جهالت يوخوسوندان اوياتدین. بيزيم عآغلیمیزا گلمه ين شئيلري سن بيزه اؤيرتدين. گؤروشمک اوزره قورخماز و بيلگين دوست.
قاراجا بالیق چاغلاياندان آشاغی آتیلدی. بول سولو بير بورولغانا دوشدو. اؤنجه اؤزونو ايتيردي، سونرا ايسه باشلادی اطرافی گزمه يه. او آنادک بير يئره بيريکميش بو قدر سويو گؤرمه ميشدي. مينلرجه چؤمچه بالیق سودا او يان بو يانا قاچیشیردیلار. قاراجا بالیغی گؤرجک اونا سؤز آتیب، مسخره ائتمه يه باشلادیلار: طور- صيفتينه باخ! بو دا نه بيچيم ياراتیقدیر؟!
قاراجا بالیق اونلارین داورانیشلارینا ياخشیجا ديقت ائده رک دئدي: لوطفا مني تحقير ائتمه یين! منيم آدیم قاراجا بالیقدیر. سيز ده آدینیزی سؤيله سه نيز تانیش اولاریق.
چؤمچه بالیقلاردان بيري دئدي: بيز بير بيريميزي چؤمچه بالیق دئيه چاغیریریق.
ایکينجيسي دئدي: بيزيم اصل- نجابتيميز چوخ اولودور. بيز نجابتلي بير سويدانیق. اوچونجوسو دئدي: بيزدن داها گؤزه لي دونيادا تاپیلماز.
قاراجا بالیق دئدي: سيزين اؤزونوزو بو قدر به يه نميش اولمانیزی هئچ عآغلیما گتيرمزديم. آنجاق اولسون، من سيزي باغیشلايیرام. چونکو بوتون سؤيله ديکلرينيز جهالتينيز و بيلگيسيزليگينيز اوزوندندير.
چؤمچه بالیقلار قیشقیردیلار: يعني بيز جاهيليک؟
قاراجا بالیق دئدي: جاهيل اولماسايدینیز بيلردينيز دونيادا سيزدن فرقلي چوخلاری وار کي، گؤرکملري اؤزلري اوچون چوخ دا سئويمليدير. سيزين آدینیز دا حتّی اؤزونوزون دئييل.
چؤمچه بالیقلار چوخ سينيرلنديلر، آنجاق گؤردولر کي، قاراجا بالیق دؤغرو سؤيله يير، يئرسيز دوشمنچيليکدن ال چکيب دئديلر: سن اؤزونو نه حاق اورا- بورا چیرپیرسان. بيز سحردن آخشاما قدر دونيانی گزيريک، آنجاق اؤزوموزدن، آتا-آنامیزدان باشقا کيمسه ني گؤرموروک. بير ده کيچيجيک سورونگن قوردلاری گؤروروک کي، اونلاری دا سايماریق.
قاراجا بالیق دئدي: سيز کي، بو باتاقلیقدان دیشاریيا چیخمیرسينيز، دونيانی نئجه گزه بيلرسينيز؟
چؤمچه بالیقلار دئديلر: يوخسا بو باتاقلیقدان باشقا آيری بير دونيا دا وار؟
قاراجا بالیق دئدي: ان آزی فيکيرلشمه ليسينيز کي، بو سو هاردان بورايا گلير و سودان کناردا نه لر اولا بيلر.
چؤمچه بالیقلار دئديلر: سويون کنارینداکي دونيا نه دئمکدير، هارادیر؟ بيز کي، سويون کنارینداکي دونيانی هئچ واخت گؤرمه ميشيک. هاهاها...هاهاها. سنين باشین خاراب اولموش.
قاراجا بالیق دا چؤمچه بالیقلارین گولونج حرکتلرينه گولومسه دي. فيکيرلشدي کي، بونلار دوزله سي دئييل، بونلاری ترک ائديب يولچولوغا داعوام ائتمک لازیمدیر. آنجاق بيردن عآغلینا گلدي کي، بلکه چؤمچه بالیقلارین آنالاری ايله ده بير نئچه کلمه دانیشسین. اونلارا دئدي: ياخشی، آنانیز هاردادی؟
بو زامان قورباغانین زيل سسي قاراجا بالیغی ديکسينديردي. قورباغا باتاقلیغین قیراغیندا بير داشین اوستونده اوتورموشدو. اؤزونو سويا آتاراق قاراجا بالیغا ياخینلاشیب دئدي: من بوردايام. بويوروغونوزمو وار؟
قاراجا بالیق دئدي: سالام يئکه خانیم.
قورباغا دئدي: آي سويو- سوپو بيلينمز اولان ياراتیق، عآغلی کسمز ائولادلاریما فضيلتدنمي دانیشیرسان؟ من او قدر عؤمور سورموشم کي، بو باتاقلیقدان باشقا بير دونيانین اولمادیغینی گؤرموش، دويموش، آنلامیشام. ياخشیسی بودور اؤز ايشينله مشغول اول، منيم ائولادلاریمی يولدان چیخارما!
قاراجا بالیق دئدي: يوز دفعه بئله عؤمور سورسن ده يئنه جاهيل، دوشونجه سيز قورباغادان باشقا بير شئي اولماياجاقسان.
قورباغا سينيرله نيب قاراجا بالیغین اوزَرينه آتیلدی. قاراجا بالیق جَلد حرکت ائديب، ايلدیریم سورعتي ايله اورانی ترک ائدرکن، زیغ-زیمیریغی لاخلادیب باتاقلیقداکي يوخويا دالمیش کيچيجيک سورونگن قورتلارین دا يوخوسونو قاچیردی.
زيروه لي داغلارین آياغینا دولاشان دره نين سويو چوخالمیشدی. زيروه دن دره يه باخارکن آرخ نازيک بير آغ ايپليک کيمي گؤرونوردو. داغدان قوپوب دره يه يووارلانمیش بؤيوک بير قايا سويو ايکي حيصه يه بؤلموشدو. ال بويدا بير قیزبوغان قايانین اوستونده اوزانیب گونشين ايستيسيندن لذت آلیر، بير آز کناردا بير قورباغانی يئمکله مشغول اولان قیرخاياغا باخیردی. قورباغاني يئين قيرخاياغي گؤرجک قاراجا باليغين ايچينده بير قورخو حيسسي اوياندي. اوزاقدان قيرخاياغا سالام سؤيله دي. قيرخاياق اَيري-اَيري قاراجا باليغا باخاراق دئدي: نه ادبلي باليقدير! بري گل گؤروم باليقجيق، گل، بري گل!
قاراجا باليق دئدي: من دونياني گزمه يه گئديرم و جنابينيزين يئمي اولماق ايستميرم.
قيرخاياق دئدي: سن نييه بو قدر اينامسيز و قورخاقسان باليقجيق؟
قاراجا باليق دئدي: من نه اينامسيزام، نه ده قورخاق. سادجه گؤزومون گؤردويونو و عاغليمين قاوراديغيني سؤيله ييرم.
قيرخاياق دئدي: ياخشي، سؤيله گؤرک گؤزون نه گؤردو و عاغلين نه دوشوندو کي، سن ائله بيلدين من سني اوولاياجاغام.
قاراجا باليق دئدي: اؤزونوزو بيلمزلييه وورمايين!
قيرخاياق دئدي: قورباغانيمي دئييرسن؟ اشي... گئرچکدن ده سن لاپ اوشاق کيميسن. من قورباغالاري سئوميرم، هئچ سئوميرم. او اوزدن ده اونلاري گؤرجک اوولاييرام. بيليرسنمي، قورباغالار ائله بيليرلر دونيانين بيريجيک موتلو جانليلاري اونلاردير. من ايسه اونلارا دونيانين گئرچک حاکيمي نين کيم اولدوغونو ايثبات ائتمک ايسته ييرم. اونا گؤره ده سن قورخما، بري گل، گل...
قيرخاياق بو سؤزلري دئييب ييرغالانا- ييرغالانا قاراجا باليغا طرف يئريدي. او قدر گولونج يئريشي وار ايدي کي، قاراجا باليق گوله رک سؤيله دي: آي يازيق، سن هله يئريشيني بئله بيلميرسن، دونيايا کيمين حاکيم اولوغونو هاردان بيله جکسن؟
قاراجا باليق قيرخاياقدان اوزاقلاشيردي. سويون اوزرينه بير کؤلگه دوشدو. سرت بير ووروش قيرخاياغي قومسالليغا باسيب يوخ ائتدي. قاراجا باليق گولمه سيني زورلا جيلوولادي. بو زامان گؤردو کي، آرخين قيراغيندا کيچيک بير چوبان اوغلان دوروب اونلارا باخيرميش. بير سورو قويون آرخا ياخينلاشيب سو ايچمه يه باشلادي. قويونلارين مه له شمه لري دره ني باشينا آلميشدي. دره قويونلارين سسي ايله دولموشدو. قويون سوروسو سو ايچيب اوردان اوزاقلاشديقدان سونرا، قاراجا باليق قيزبوغاني سسله ييب سؤيله دي: حؤرمتلي قيزبوغان منيم آديم قاراجا باليقدير. بو آرخين سونونو تاپماقدا قرارلييام. سانيرام سيز عاغيللي و بيلگين بير جانليسينيز. لوطفا منيم بير سوروما جاواب وئرين!
قيزبوغان دئدي: بويور، نه ايسته ييرسن سور!
قاراجا باليق دئدي: گه لرکن يولدا مني باليق اودان قوشدان و ناققا باليقدان چوخ قورخوزوردولار. اگر بو هاقدا بيلگينيز وارسا اسيرگه مه یين، منه سؤيله یين!
قيزبوغان دئدي: ناققا بو طرفلرده اولماز. او، ان چوخ دنيزده ياشايير. آنجاق باليق اودان قوش بو ياخينلاردا اولماليدير. آييق اول کي، آلدانيب اونون کيسه سينه دوشمه يه سن!
قاراجا باليق دئدي: کيسه؟! کيسه ندير؟
قيزبوغان دئدي: باليقودان قوشون بوغازي نين آلتيندا بير کيسه وار. بو کيسه چوخ سو توتار. باليقودان سودا اوزرکن بعضي باليقلار بيلمه دن دوشرلر اونون بوغازي نين آلتينداکي کيسه يه. باليقودان آج اولماسا باليقلاري کيسه ده ساخلار، آجيخديغيندا يئير.
قاراجا باليق دئدي: اونون کيسه سينه دوشدوکدن سونرا قورتولماق مومکون دئييلمي؟
قيزبوغان دئدي: يالنيز بير قورتولوش يولو وار، کيسه ني ييرتيب قاچماق. من سنه بير قيلينج وئرجه يَم. باليقودانا راست گلسن بو قيلينج سنه يارديمچي اولاجاق.
قيزبوغان داشين جيريغينا گيريب الينده بير قيلينج قاييتدي. قاراجا باليق قيلينجي آليب دئدي: سئويملي قيزبوغان سيز چوخ مئهريبانسينيز. بيلميرم سيزه نئجه تشککور ائديم؟
قيزبوغان دئدي: تشککوره گرک يوخ. منيم چوخ قيلينجيم وار. ايشيم اولماديغيندا اوتوروب بيتکيلرين تيکانلاريندان قيلينج دوزلديرم و سنين کيمي بيلگين، قورخماز باليقلارا هدييه وئريرم.
قاراجا باليق دئدي: مندن اؤنجه ده دنيز آختاريشيندا اولان باليقلار بوردان کئچيبلر مي؟
قيزبوغان دئدي: چوووخ، چوخلاري بوردان گليب کئچيبلر. آرتيق اونلار بؤيوک دسته يه چئوريلميش باليقچيلاري بئزديرميشلر.
قاراجا باليق دئدي: باغيشلايين، سؤز سؤزو گتيرير. اونلارين باليقچيلاري نئجه بئزديرمه لري هاقدا مومکونسه بير آز گئنيش بيلگي وئرين.
قيزبوغان دئدي: ونلار او قدر چوخالميشلار کي، باليقچيلار باليق توتماق اوچون دنيزه تور آتاندا تورو دارتيب باليقچيلارين اللريندن چيخاريب و دنيزين ديبينه آپاريرلار.
قيزبوغان قولاغيني داشين ده ليگينه سؤيکه ييب ديقتله قولاق آسماغا باشلادي. سونرا دا قاراجا باليغا دئدي: من آرتيق گئتمه لييم. چوجوقلاريم يوخودان اويانميشلار. سنه اوغورلار ديله ييرم.
قيزبوغان داشين ده ليگينه گيرديکدن سونرا قاراجا باليق يولونا داعوام ائتدي. يولا دوشدوکدن سونرا يوزلرجه جاوابسيز سواللار بئينيني سارميشدي. اؤز-اؤزونه سوروشوردو: دوغرودانمي آرخ دنيزه تؤکولور، يوخسا منيم اويدورمامدير؟ باليقودان قوشون گوجو منه چاتارمي؟ آنجاق من کي اونا هئچ پيسليک ائتمه ميشم، بيزيم کي آراميزدا هئچ بير دوشمنليک يوخدور، ندن مني يئمک ايسته سين؟
قاراجا باليق فيکيرلره، خياللارا دالغينجاسينا گئديردي. يولچولوغونون هر آشاماسيندا يئنيليکلرله راستلانير، يئني شئيلر اؤيره نيردي. هوندور چاغلايانلارين (شلاله لرين) باشيندان دونبالاق آشاراق دره يه توللانماقدان لذت آليردي. گونشين ايستيسي آرخاسيني ايسيديردي. قاراجا باليق ياشامينداکي بوتون بو اولايلاردان ذؤوق آليردي. بير جئيرانا راستلاندي. جئيران تلسه-تلسه سو ايچيردي. قاراجا باليق سئوينه رک دئدي: گؤزل جئيران، نييه بئله تله سيرسن؟
جئيران دئدي: اووچو آرخامجادير. بالديريما بير باخ. گولله دَيميش.
قاراجا باليق گولله ياراسيني گؤره بيلمه دي، آنجاق جئيرانين آخساياراق قاچماسيندان آنلادي کي، دوغرو سؤيله يير.
بير يئرده باغالارين قيزمار گونشين آلتيندا مورگولمه لريني گؤردو. باشقا بير يئرده ايسه ککليکلرين هوسله، سئوگي ايله ماهني سؤيلمه لرينه تانيق (شاهيد) اولدو. داغلاري بوروموش چيچکلرين قوخوسو هاوادا دالغالاناراق سويا قاريشيردي.
گونورتادان سونرا دره نين ائله بير يئرينه چاتدي کي، آرخ بير اورمانين اورتاسيندان کئچيردي. سو او قدر چوخالميشدي کي، قاراجا باليق گئرچکدن ده بو قدر بول سويون ايچينده اولماقدان لذت آليردي. بير آز داها گئتديکدن سونرا بير سورو باليغا راستلاندي. آناسيندان آيريلديغي گوندن باليق گؤرمه ميشدي. بير نئچه کيچيک باليق قاراجا باليغا ياخينلاشاراق دئديلر: سانکي قريبسن، دئييلمي؟
قاراجا باليق دئدي: هه غريبه م. اوزاقدان، چوووخ اوزاقلاردان گليرم.
کيچيک باليقلار سوردولار: هارا گئتمک ايسته ييرسن؟
قاراجا باليق دئدي: آرخين سونونو تاپماغا گئديرم.
کيچيک باليقلار دئديلر: هانسي آرخين؟
قاراجا باليق دئدي: ايچينده اوزدويوموز بو آرخين سونونو آراماغا، آختارماغا گئديرم.
کيچيک باليقلار دئديلر: بو آرخ دئييل کي، بيز بونا چاي دئييريک.
قاراجا باليق بير شئي سؤيله مه دن سوسقونجا دوردو. کيچيک باليقلاردان بيريسي دئدي: هئچ بيليرسن مي باليقودان قوش او طرفلره گئدن باليقلاري اوولايير؟
قاراجا باليق دئدي: هه، بيليرم.
کيچيک باليقلاردان بير باشقاسي سؤيله دي: باليقودان قوشون چوخ بؤيوک بير کيسه سي نين وار اولدوغونو دا بيليرسنمي؟
قاراجا باليق دئدي: بونو دا بيليرم.
کيچيک باليق سوردو: بوتون بونلاري بيله رک يئنه ده گئتمکمي ايسته ييرسن؟
قاراجا باليق دئدي: هه، نئجه اولورسا-اولسون گئتمه لييم.
باليقلارين آراسيندا پيچي-پيچي صؤحبتلر باشلادي کي، قاراجا باليق چوخ اوزاقلاردان يولا دوشوب گلميش و چايين سونونو آراييب تاپماق ايسته يير. باليقودان قوشدان دا قورخمور! کيچيک باليقلاردان بير نئچه سي قاراجا باليغا قاتيليب گئتمک خيالينا دوشدولر. آنجاق بؤيوکلري نين قورخوسوندان سسلريني چيخارا بيلمه ديلر. بير نئچه سي ده سؤيله دي: باليقودان قوش اولماسايدي سنينله گه لرديک. بيز باليقودان قوشدان قورخوروق.
چايين کناريندا بير کند وار ايدي. کندين قادينلاري و قيزلاري چايدا پالتار يويوردولار. قاراجا باليق بير سوره پالتار يويان قيزلارين ماهنيلاريني دينله دي. بير سوره ده چايدا چيمن اوشاقلارا تاماشا ائتديکدن سونرا يولچولوغونا داوام ائتدي. گئتدي... گئتدي... گئتدي... بير داها گئتدي. آرتيق گئجه اولموشدو. بير داشين آلتينا سيغينيب ياتدي. گئجه ياريسي يوخودان اوياندي. گؤردو آي سويون ايچينه دوشموش و هر يئري ايشيقلانديرميشدير. قاراجا باليق آيي چوخ سئويردي. گئجه لر آي سويا دوشدويو زامان ياتديقلاري داشين آلتيندان چيخيب آيلا دانيشماق، اونونلا آرخاداش اولماق ايستردي. آنجاق هر دفعه ده آناسي مانع اولاردي.
قاراجا باليق آيين يانينا گئديب دئدي: اسنليکلر آي، گؤزل آي.
آي دئدي: اسنليکلر قاراجا باليق. سن هارا بورا هارا!؟
قاراجا باليق دئدي: دونياني گزمه يه چيخميشام.
آي دئدي: دونيا چوخ بؤيوکدور. بوتون دونياني گزه بيلمزسن.
قاراجا باليق دئدي:اولسون. باشارديغيم قدر گزه جه یم.
آي دئدي: گون دوغانا قدر سنين يانيندا قالماق ايسترديم. آنجاق قارشيدان قارا بولود گلير. منيم اؤنومو کسيب ايشيغيمين قارشيسيني آلاجاق.
قاراجا باليق دئدي: سئوگيلي آي، من سني چوخ سئويرم. سنين ايشيغي نين وورغونويام.
آي دئدي: سئوگيلي قاراجا باليق، منيم ايشيغيم يوخدور. من ايشيغي گونشدن آليب يئره گؤندريرم. سن هئچ بيليرسنمي کي، اينسانلار اوچوب گليب منيم اوزريمه قونماق ايسته ييرلر؟ باليق دئدي: اولا بيلمز، بو مومکون دئييل.
آي دئدي: چتين ايشدير، آنجاق اينسانلار ايسته ديکلري هر شئيي...
آي سؤزونو بيتيره بيلمه دي. قارا بولود آيين اوزرينه سريلدي. هر يئر قارانليق اولدو. قاراجا باليق يئنه ده يالنيز قالدي. بير نئچه دقيقه قارانليغي و سسسيزليگي دينله دي، سونرا دا بير داشين آلتينا گيريب يوخويا دالدي.
سحر ائرکن يوخودان قالخارکن باشي نين اوستونده پيچيلداشان بير نئچه کيچيک باليق گؤردو. باليقلار قاراجا باليغين يوخودان اويانماسيني گؤردوکلري آن بير آغيزلا سؤيله ديلر: گون آيدين، قاراجا باليق.
قاراجا باليق اونلاري تانيميشدي، دئدي: گون آيدين! سانکي منيمله يول يولداشي اولماق قرارينا گلميشسينيز، دئييلمي؟
باليقجيقلاردان بيري دئدي: هه، آنجاق هله ده قورخوروق.
بير باشقاسي دئدي: باليقودان قوشون قورخوسو بيزي ترک ائتمير.
قاراجا باليق دئدي: سيز چوخ فيکيرلشيرسينيز. گئجه گوندوز اوتوروب سادجه فيکيرلشمک دوغرو دئييلدير. يولا دوشدوکدن سونرا قورخو هيسسيميز يوخ اولاجاق.
حرکت ائتمک، يولا دوشمک ايسته ييرديلر کي، اطرافداکي سولار قالخدي و باشلاري نين اوستونو بير قارا اؤرتو اؤرتدو. هر يئر قاپ-قارانليق اولدو. قاچيش يولو قالمادي. قاراجا باليق آنلادي کي، باليقودان قوشون تله سينه، کيسه سينه دوشموشلر.
قاراجا باليق دئدي: دوستلار، بيز باليقودان قوشون تله سينه دوشدوک. آنجاق قاچيش يولو تام اولاراق قاپانماميشدير.
کيچيک باليقلار آغلاماغا، سيزلاماغا باشلاديلار. بيريسي دئدي: يازيق اولدوق. قاچيش يولوموز قاپاندي. قاراجا باليق گوناهکار سنسن. سن بيزي يولدان چيخاردين.
بير باشقاسي سؤيله دي: يندي باليقودان قوش بيزيم هاميميزي اوداجاق. يازيق اولدوق. ايشيميز بيتدي.
بيردن قورخونج گولوش سسلري هر طرفي ساردي. بو سس باليقودان قوشون گورولتولو گولوشلري نين سسي ايدي. باليقودان قوش قورخونج گولوشلرينه قاريشميش سؤزلرله دئدي: نه قدر دادليجا باليقلاردير بونلار...هاهاها...هاهاها...يازيق باليقجيقلار. سيزين حالينيزا اورگيم يانير. سيزي هئچ اوداسيم گلمير...هاهاها...
کيچيک باليقلار يالوارماغا باشلاديلار: ائي بؤيوک وارليق، بيز سيزين تعريفينيزي چوخ اؤنجه لر ائشيتميشيک. اگر لوطف ائديب ديمديگينيزي بير آزجيق آرالاسايدينيز بيز بوردان چيخيب و عؤمروموزون سونونا قدر ده سيزه دوا ائدرديک.
باليقودان دئدي: من سيزي هله اودماياجاغام. هله قارنيم توخدور. قارنيما باخسانيز گؤررسينيز. سيزي بير آزدان يئيه جه یم.
کيچيک باليقلار باليقودانين مده سينه باخيب خئيلي اؤلموش باليق گؤروب، قورخودان زاغ-زاغ تيترمه يه باشلاديلار. کيچيک باليقلار دئديلر: ائي اولو وارليق، ائي دنيزلرين شاهي، بيز بير ايش گؤرمه ميشيک. بيزيم هئچ بير سوچوموز يوخدور. بيزي يولدان چيخاران بو قاراجا باليق اولدو.
قاراجا باليق دئدي: قورخاقلار! ائله بيليرسينيز بو غدار باليقودان سيزين بو عاجيزانه يالواريشلارينيزا رحممي ائده جک؟
کيچيک باليقلار دئديلر: سن هئچ نه دانيشديغي نين فرقينده سنمي؟ ايندي گؤره جکسن کي، نئجه ده چوخ حؤرمتلي باليقودان جنابلاري بيزي آزاد ائديب، سني ايسه مده سينه طرف يولا سالاجاق.
باليقودان دئدي: هه ائله دي. من سيزي باغيشلايا بيلرم. آنجاق بير شرطيم وار.
کيچيک باليقلار بير سسله دئديلر: شرطينيزي بويورون ائي اولو باليقودان.
باليق اودان دئدي: اؤزگورلوگونوزو قازانماق اوچون او قارا باليغي اؤلدورمه ليسينيز.
قاراجا باليق اؤزونو بير طرف چکيب کيچيک باليقلارا دئدي: کسينليکه اونون تکليفيني قبول ائتمه یين. بو ريياکار باليقودان ايسته يير بيزي بير- بيريميزه اؤلدورتسون. منيم بير پلانيم وار...
آنجاق کيچيک باليقلار اؤزگورلوکلريني الده ائتمک اوچون قاراجا باليغي دينله مه دن اونا هوجوم ائتمک ايسته ديلر. قاراجا باليق يئرينده مؤحکم دوراراق ياواشجا سؤيله دي: قورخاقلار، هر حالدا سيز اسير دوشموشسونوز، قورتولوش يولونوز دا يوخدور. منه ده گوجونوز چاتماز.
کيچيک باليقلار دئديلر: سني اؤلدورمه لي یيک. بيز اؤزگورلوگوموزو ايسته ييريک. قاراجا باليق دئدي: عاغلينيزيمي ايتيردينيز؟ سيز مني اؤلدورسنيز بئله، يئنه ده اؤزگورلوگونوزو الده ائده بيلمه يه جکسينيز. اونون فيريلداقلارينا اينانمايين!
کيچيک باليقلار دئديلر: سن بو سؤزلري جانيني قورتارماق اوچون سؤيله ييرسن. سن بيزيم حياتيميزي دوشونمورسن.
قاراجا باليق دئدي: ديقتله قولاق آسين. من سيزه بير شئي سؤيلخ يه جه یم. من باليقودانين قارنينداکي اؤلو باليقلارين ايچينده اؤزومو اؤلموشلويه ووراجاغام. اوندان سونرا باخاق گؤرک باليقودان سيزي آزاد بوراخاجاقمي؟ اگر منيم سؤزلريمي دينله مه سه نيز بو قيلينجلا هامينيزي اؤلدوره جه یم. سونرا دا باليقودانين قارنيني سؤکوب گئده جه یم و سيز...
کيچيک باليقلاردان بيريسي قاراجا باليغين سسيني کسه رک دئدي: يئتر، يئتر داها. من بو سؤزلري دينله مک ايستميرم. اوهو... اوهو... اوهو...
قاراجا باليق اونون آغلاماسيني گؤروب دئدي: بو ناز-نازيني نييه اؤزونوزله گتيرميشسينيز؟
سونرا قيلينجيني قينيندان چيخاريب اونلارين گؤزلري اؤنونه توتدو. اونلار ايسه چاره سيز قالاراق قاراجا باليغين تکليفيني قبول ائتديلر. بير-بيرلري ايله بير آز بوغوشدوقدان سونرا قاراجا باليق اؤزونو اؤلموشلويه ووردو. کيچيک باليقلار باليقودانا دئديلر: اولو باليقودان، او حياسيز قاراجا باليغي اؤلدوردوک.
باليق اودان گوله رک دئدي: چوخ ياخشي ايش گؤردونوز. گؤردويونوز بو ايشين حسابينا ايندي سيزين هامينيزي ديري- ديري اوداجاغام. آرتيق قارنيم آجيقماقدادير.
کيچيک باليقلار ايلديريم سورعتي ايله اودولاراق باليقودانين مده سينه يوللانديلار. دوغرودان دا ايشلري بيتدي.
قاراجا باليق بو آن قيلينجيني چيخاريب باليق اودانين قارنيني سؤکه رک ديشارييا توللاندي. باليقودان قارني نين آغريسيندان باغيرماغا باشلادي. قاراجا باليغي ايزله مک ايسته دي، آنجاق باشارمادي. سويا باتاراق اؤلدو.
قاراجا باليق گئتدي، گئتدي، گئتدي. آرتيق گونش گؤيون اورتاسيندا ايدي. آرتيق داغ دره سونا وارميشدي. چاي گئنيش بير دوزنگاهدا آخيردي. ساغ-سولدان بير نئچه باشقا چاي دا قاراجا باليغين بولوندوغو چايا قاتيليردي. قاراجا باليق عؤمرونده بو قدر سو گؤرمه ميشدي. سويون چوخلوغونا حئيرت ائدير، لذت آليردي. بيردن اؤزونه گلدي و گؤردو کي، سويون ديبي گؤرونمور. نه قدر چابالاديسا سويون ديبيني گؤره بيلمه دي. ايسته ديگي کيمي سودا عوذوردو. آنجاق سويون حددي- حودودونو گؤره بيلميردي. بير آن يئکه بير هئيوانين سورعتله اونا طرف گلديگيني سئزدي. بو هئيوانين آغزي نين قاباغيندا قايچي کيمي بير ميشار گؤرونوردو. قاراجا باليق فيکيرلشدي کي، آرتيق عؤمرونون سونو گلميش و اينديجه ميشارباليق اونو پارام- پارچا ائده جک. سورعتله اؤزونو سويون اوزرينه چيخاردي. بير آزدان بير داها دنيزين ديبلريني گؤرمک اوچون سويون درينليکلرينه دالدي.
سويون اورتاسيندا بير سورو باليغا راست گلدي. مينلرجه، اون مينلرجه باليق سوروسو. بيريسيندن سوردو: آرخاداش، من قريب بيريسييم. اوزاقلاردان گليرم. بورا هارادير؟
باليق، آرخاداشلاريني سسله يه رک دئدي: «باخينيز، بيريسي داها گلميش.» سونرا دا قاراجا باليغا دئدي: آرخاداش، دنيزه خوش گلميسن.
باليقلاردان بير باشقاسي دئدي: بوتون چايلار و آرخلار بورايا تؤکولور. آنجاق بعضيلري ده باتاقليقلارا هوپور.
ديگري دئدي: نه زامان ايسته سن بيزيم دسته ميزه قاتيلا بيلرسن.
قاراجا باليق حدفينه، دنيزه چاتديغي اوچون سئوينيردي. دئدي: ايذن وئرسه نيز چيخيب بير آز تک باشيما دنيزي سئير ائديم، سونرا گليب سيزه قاتيلارام. ايسته ييرم بو دفعه باليقچيلارين تورونو دارتيب دنيزين ديبينه چکديگينيزده من ده آرالارينيزدا اولوم.
باليقلاردان بيري دئدي: تئزليکله اؤز ايسته یينه چاتارسان. ايندي گئت سئير ائله. گئت گز، آنجاق دنيزين اوزونه چيخديغيندا باليقودان ناققايا راستلانسان ديقتلي اول. ناققانين هئچ ندن قورخوسو يوخدور. هر گون دؤرد- بئش باليق يئيير. باليقلارين باش بلاسي اولموش.
قاراجا باليق باليقلار سوروسوندن آيريليب اوزمه يه باشلادي. بير آزجيق زامان کئچديکدن سونرا دنيزين اوزرينه چيخدي. گونشلي بير گون ايدي. قاراجا باليق گونشين دادلي هرارتيني آرخاسيندا هيسس ائده رک لذت آليردي. بؤيوک بير سئوينج و موتلولوق ايچينده سئير ائدير و فيکيرلشيردي: «اؤلوم هر آن مني ياخالايا بيلر. آنجاق من باشارديغيم قدر ياشامالي، اؤلومدن قاچمالييام. آنجاق اؤلومله قارشيلاشا دا بيلرم. اؤنملي دئييل، اؤنملي اولان بودور کي، منيم حياتيم و يا اؤلوموم باشقالاري نين حياتينا نئجه تاثير گؤستره جکدير.»
قاراجا باليق بو خياللاريندان آيريلمادان باليق يئين ناققايا توش گلدي. قاراجا باليق ناققانين ايکي ديمديگي آراسيندا چابالايير، وورنوخوردو. ناققا قاراجا باليغين بئليني يئکه ديمديکلري ايله ائله سيخيشديريردي کي، آز قالميشدي قاراجا باليغين جاني چيخسين. کيچيک بير باليق سودان کناردا نه قدر ديري قالا بيلر کي؟ قاراجاباليق فيکيرلشدي کئشکه ناققا اونو تئز اودسايدي. چونکو اونون مده سينده کي روتوبت اوزوندن بير آز داها ديري قالا بيلردي. بو فيکريني گئرچکلشديرمک اوچون ناققايا دئدي: نييه مني ديري-ديري اودمورسونوز؟ من او باليق تورلريندنم کي، اؤلدوکدن سونرا بدنلري زهر تولوغونا دؤنور.
ناققا بير شئي دئمه دي، آنجاق اؤز-اؤزونه فيکيرلشدي:آي حوققا باز. ايسته ييرسن مني صؤحبته توتوب آغزيمدان چيخيب قاچاسان.
ساهيل اوزاقدان گؤرونور و ناققا ساهيله طرف گئديردي. قاراجا باليق فيکيرلشدي: «ساهيله چاتديقدان سونرا آرتيق منيم ايشيم بيتميشدير دئمکدير.» بو اوزدن ده دئدي: بيليرم مني بالالارينا يئم اولاراق آپاريرسان. آنجاق من ساهيله چيخديقدان سونرا اؤله جه یم، بدنيم باشدان آياغا زهر اولاجاقدير. بالالارينا يازيغين گلميرمي؟
ناققا دوشوندو: «احتياط دا ياخشي شئيدي. سني اؤزوم يئيرم، بالالاريما باشقا باليق اوولارام... آنجاق باخيم گؤروم مني آلداتمير کي.» ناققا بو فيکيرده ايدي کي، گؤردو قاراجا باليغين بدني حرکتسيزلشميش و ترپنمير. فيکيرلشدي: «يعني اؤلدومو؟ واي واي آرتيق اؤزوم ده يئيه بيلمه يه جه یم. بو قدر دادلي باليغي نه هاق اؤزومه هارام ائتديم. الدن چيخارديم.»
بو اوزدن قاراجا باليغا «هئي کيچيک باليق بير آزجيق جانين وارمي سني يئييم، يوخسا اؤلموسن؟» دئيه سسلنمک ايسته دي. آنجاق سؤزونو بيتيره بيلمه دي. آغزي آچيلار-آچيلماز قاراجا باليق اؤزونو دنيزه آتدي. ناققا گؤردو کي، قاراجا باليق اونو آلداتميش، باشلادي قاراجا باليغين آرخاسينا دوشوب تقيب ائتمه يه. قاراجا باليق اؤزونو قورتولموش سانيردي، آنجاق ناققا ايلديريم سورعتي ايله اونون آرخاسينجا ايدي. ناققا قاراجا باليغي ياخالاييب و ياخالاجاق دا اوددو. بو حاديثه او قدر سورعتله گئرچکلشدي کي، قاراجا باليق نه لر اولدوغونو آنلايا بيلمه دي. آنجاق هر طرفين روطوبتلي و قارانليق اولدوغونو ياواش ياواش سئزمه يه باشلادي. بير آز داها زامان کئچديکدن سونرا بير آغلاما سسي ائشيتدي. گؤزلري قارانليغا آليشديقدان سونرا بير کونجه سيخيليب آغلايان، آناسيني چاغيران کيچيک بير باليغي گؤردو.
قاراجا باليق اونا ياخينلاشيب دئدي: آرخاداش، آغلاماق، آناني چاغيرماق چاره دئييلدير. قالخ و اؤز آزادليغي نين اوغروندا فيکيرلش، بير ايشلر گؤر.
باليقجيق دئدي: سن ده داها کيمسن، گؤرمورسنمي محو اولماقدايام. اوهو... اوهو..وهو... آنا... آي آنااا بير داها سنينله بير يئرده باليقچيلارين تورلاريني دارتيب دنيزين ديبينه آپارا بيلمه يه جه یم. اوهو... اوهوو...
قاراجا باليق دئدي: کس سسيني، سن دونيادا نه قدر باليق وارسا هاميسي نين آبريني آپاردين.
باليقجيق آغلاماسيني دوردوردوقدان سونرا قاراجا باليق دئدي: من ناققاني اؤلدورمک و بوتون باليقلاري بو غدار هئيوانين تهلوکه سيندن قورتارماق ايسته ييرم. آنجاق منيم ايشلريمه قاريشماماق، ال آياغيما دولاشماماق اوچون اؤنجه سني بوردان آزاد ائديب ديشارييا گؤندرمه لييم...
باليقجيق دئدي: سن اؤزون اؤلمک اوزره سن ناققاني نئجه اؤلدوره جکسن؟
قاراجا باليق قيلينجيني گؤستريب دئدي: بو قيلينجلا اونون قارنيني سؤکه جه یم. ايندي ديقتله مني دينله. من ناققانين قارنيندا رقص ائتمه يه باشلاياجاغام. بو زامان ناققانين قيديغي گله جک و باشلاياجاق گولمه يه. ناققانين آغزي آچيلديغي زامان سن اؤزونو ديشارييا توللا!
باليقجيق دئدي: سن اؤزون نه اولاجاقسان؟
قاراجا باليق دئدي: سن مني دوشونمه. من بو غداري اؤلدورمه يه نه دَک بوردان چيخماياجاغام.
قاراجا باليق بو سؤزلري دئديکدن سونرا ناققانين قارنيندا رقص ائتمه يه باشلادي. بو حرکتدن خوشلانيب قيديقلانان ناققا «هاها هاهاه هاها» گوله مه يه باشلادي. بو آن باليقجيق اؤزونو ناققانين آغزيندان ديشاري، دنيزه آتدي. آنجاق نه قدر گؤزله دي ايسه قاراجا باليقدان خبر چيخمادي.
بير آز داها زامان کئچديکدن سونرا باليقجيق گؤردو کي، ناققا آغريدان، درددن گرنه شه رک باغيرماغا باشلادي. سونرا دا شاپپيلتي ايله دونبالاق آشاراق سويا دوشوب جان چکيشدي. آنجاق قاراجا باليقدان خبر چيخمادي کي، چيخمادي. بو گونه قدر ده اوندان بير خبري اولان يوخدور.
ياشلي باليق ناغيليني بيتيردي. اون ايکي مين نوه نتيجه سينه «آرتيق ياتماق واختيدير چوجوقلار گئدين ياتين!» سؤيله دي.
ياشلي باليغين نوه نتيجه لري بير آغيزلا: «ننه جان قاراجا باليغين سونونون نئجه اولدوغونو سؤيله مه دين» دئديلر.
ننه باليق دئدي: ائولادلاريم، او دا قالسين گلن گئجه يه. ايندي ايسه گئديب ياتين. گئجه نيز خئييره قالسين!
اون بير مين دوققوز يوز دوخسان دوققوز کيچيک باليق: «سنين ده گئجن خئييره قالسين ننه» سؤيله ييب ياتديلار. ننه باليق دا ياتدي. آنجاق کيچيک قيرميزي باليق نه قدر چاليشديسا ياتا بيلمه دي. يوخوسو گلميردي. او، سحردَک دنيز عشقي ايله يئرينده چابالاييب دوردو. يالنيز بير شئي دوشونوردو: دنيز...
