9 Haziran 2010 Çarşamba

آلا اينک




آلا اينک
   
          ائويميزده کي حئيوانلارلا درين دوستلوق باغلانتيلاريم وار ايدي. کؤپکلريميز، آتيميز، اينکلريميز. هاميسيني سئويرديم. اينکلريميزين ايچينده ايسه، آلا اينگين آيريجا يئري وار ايدي. آلا اينک گؤزومو دونيايا آچديغيم گوندن قاپيميزدا ايدي. نه زاماندان بيزيم ياشاييشيميزين بير پارچاسي اولدوغونو خاطيرلاميرديم. آنجاق قيسير اولمادان هر ايل دوغوراراق قاپيميزي دولدوراردي دانالارلا. هله اونون سوت-قاتيغي نين بيزيم يئمک قايناغيميز اولدوغونو دئميرم. بو شکيلده آلا اينک هاميميزين سئويمليسي اولموشدو. آخشامچاغي و گون دوغارکن، آنام گؤزل شرقيلري ايله آلا اينگيميزي ساغار، من ده اونون بالاجا بوزووونون باشينا ايپ ساليب توتارديم گؤزونون اؤنونده. آلا اينک بالاسيني يالاييب، اؤزلليکله بوزووون بوينونون توکلريني سانکي ديلي ايله داراردي. بالاجا بوزوو مست اولاردي آناسي نين اونون بوينونو يالاماسيندان. من ده آليشميشديم بو گؤزللييه. آنامين الينده کي  بايدا ايله شرقي سؤيله ييب اينک ساغماسي، آلا اينگين بالاسيني يالاماسي، گونباتان چاغي و گوندوغان چاغي نين اولوشدوردوغو اسرارنگيزليک سيرلي-سِحرلي بير دونيايا اولوشدوراردي گؤزلريمين اؤنونده. ساغيم بيتديکدن سونرا بوراخارديم بوزووو تپيلردي آناسي نين قيچي نين آراسينا و باشلاردي اممه يه.  
  بير ياز گونو ايدي. هر طرف يام-ياشيل، زميلر، ساريباش شوورنلر ياواشچا اسن کولگين تاثيريندن دالغالانيردي. آنام آلا اينگي ساغدي. بوزوو آناسيني اميب هسرت گئدردي. بوزووو آناسيندان آييريب اؤز يئرينه آپارديم. آلا اينک ده ديگر ماللارلا بير يئرده اؤروشه آپاريلدي. بير نئچه بوزووو اؤزوموزله چاليشديغيميز تارلايا آپارديق. اورادا يومشاجيق تر اوتلاردان دريب آتيرديق بوزوولارين اؤنونه يئييرديلر. بوزوولاريمين بزن ده بوينونا ساريليب اوزلريندن اؤپرديم. آنام دا منه «اوغلوم، سن کي بوزوولاري بو قدر چوخ سئويرسن، ايندي گؤر من سني نئجه، نه قدر سئويرم. اينشاللاه بير گون اؤز اوشاغين اولدوغوندا منيم دئديکلريمي آنلارسان» دئيردي. قونشولارين تارلاسينا گيرمه سينلر دئيه بوزوولاريميزي آياقلاريندان ايپله باداميش*، باغلاميش و ايپين ده بير اوجونو يئره ميخلانميش دمير ميخا دويونله ميشديک. گونورتا چاغي ايدي. عادتن گونورتا چاغيندا ائودن گتيرديگيميز يئمگيميزي يئييب، سرين سو و آيران ايچديکدن سونرا کالدارلاردان** دوزلتديگيميز کؤلگجيگين آلتيندا اوزانيب 10-15 دقيقه  گؤزوموزو يوموب يورغونلوغوموزو چيخارديقدان سونرا يئنيدن تارلادا چاليشماغا باشلارديق. آناملا برابر کؤلگجيگين آلتيندا اوزانميشديق کي، بوزوولارين باغيرتيسينا ديکسينيب يوخودان اويانديق. قورد! قورد بوزوولاريميزا سالديرميشدي. قورد بيزي گؤرر-گؤرمز قاچدي. آنجاق آلا اينگين بالاسيني بوغازيندان پارچالاميشدي. قاچاراق بوزووا ياخينلاشديق. بوغازيندان قان فيشقيريردي. آنام «اوراغي گتير باشيني کسک، آرتيق بو ديري قالماز» دئدي. آنام، اللري اسه-اسه بوزووون باشيني کسدي. آغلاياراق دورومو سئير ائديرديم. بوزوو دوستوم چابالاياراق جان وئردي. ايچيم يانيردي سانکي. باشقا بوزوولاري اؤنوموزه آليب، آلا اينگين بالاسي نين جنازه سيني ده ائششگين اوستونه يوکله ييب آخشام ائوه گئتديک. آنام باجيلاريما  «بوزووو قورد پارچالادي، اتيندن يئمک بيشيرين» دئدي. گون باتميشدي آرتيق. بوتون اينکلر اؤروشدن گلميشدي حَيَطيميزده ساغيليرديلار. آلا اينک چوخ ناراحات گؤرونوردو. قويروغونو تئز-تئز ترپه ديب قولاقلاريني گؤزلري باخان طرفلره يؤنلديب بالاسيني گؤرمک ايسته ييردي. سانکي بدبختليگيني سئزميشدي آلا اينک. آنام باشقا اينکلري ساغدي. بو دفعه  آلا اينگي اؤزلليکله ان سونا ساخلاميشدي. آلا اينک بو دفعه  بالاسي گؤزونون اؤنونده اولمادان ساغيلاجاقدي. آنجاق ايمکان وئرمه دي. آياقلاريني يئره چيرپيب مله ييردي. آخشام اينگي ساغا بيلمه دي آنام. آلا اينک صاباحا قدر مله دي قاپيدا. گئجه آنام بوزووون دريسيني سويوب ايچينه سامان دولدوردو. سونرا دا دري نين بوش يئرلريني تيکدي. صاباح يئنيدن آلا اينگي ساغماق ايسترکن ايچي سامانلا دولموش بالاسي نين دريسيني قويدوق آلا اينگين اؤنونه. دري هله قوروماديغي اوچون بالاسي نين قوخوسونو آلا بيليردي. آلا اينک باشلادي بالاسي نين ايچي سامانلا دولموش دريسيني يالاماغا. آنامين گؤزلريندن ياش آخيردي. آنام گؤزل سسي ايله ياس باياتيلاري سؤيليه رک اينگي ساغماغا باشلادي:  
   «عزيزيم اوزگون آغلار 
  قاش-گؤزو سوزگون آغلار 
  بالاسي اؤلموش آنا 
  بير گولسه، يوز گون آغلار.»
  آلا اينگين گؤزلريندن ياش سئل کيمي آخيردي. بير طرفدن بوزووون اؤلمه سي، بير طرفدن آلا اينگين گؤز ياشلاري و بير طرفدن ده آنامين حزين شرقيسي روحومو ائله سارميشدي کي، هؤنکور-هؤنکور آغلاماغا باشلاديم. آنام منيم آغلاماغيمي دويدوغوندا سسيني کسدي. آنجاق آنامين گؤز ياشلاري نين ساغديغي سوتون ايچينه داملاديغيني گؤروردوم
  آنام آلا اينگي ساغديقدان سونرا گليب منيم بوينوما ساريلدي. «آغلاما بالا، نه ائده بيلريک؟ ياواش-ياواش اونودولاجاق. چوخ اوزولمه!» دئدي. بوزووون اتيندن يئمک حاضيرلاميشديلار ائوده باجيلاريم. آنجاق کيمسه يئمه دي. آلا اينگين کدري باغريميزي سارميشدي. اونون بالاسي نين اتيني نئجه يئيه بيلرديک. کدر ائويميزي بوروموشدو. بيزيم قاپيميزي برکتله دولدوران آلا اينگين درديني نئجه بو تئزلييه اونوتماق اولاردي؟ آنام اوزونو باجيلاريما توتوب  «بوزووون اتيني يئيه بيلميه جگيک. قاليب خاراب اولار. گوناهدي. صاباح آپارين وئرين قونوم-قونشولارا. ثاوابدير» دئدي.
  تکرار گئجه اولموشدو. قم ايچينده ياتميشديق. آنجاق نه يوخو. يوخوم گلميردي. آنام اليني اوزاديب ساچلاريمي اوخشاياراق «اوغلوم، گل يانيمدا يات بو گئجه، ساريل بوينوما بالا. آغلاما، کئچر گئدر» دئدي. سانکي آنام ايچيمدن کئچنلري بيلميشدي. او گئجه گئرچکدن ده آنامين بوينونا ساريليب ياتماق ايسته ييرديم. آناما  «آنا، کورگيمي قاشي! اللرينله کورگيمي قاشي، راحاتلاييرام اوندا» دئديم. آنامين اللري کورگيمده گزيشديکجه روحوم بيلينمز اوزاقليقلاردا اوچوردو. آغير آجي ايچينده يوخو آليب آپارميشدي بيزي.
  يوخومدا گؤردوم کي، آلا اينک ديل آچيب. آلا اينک ديل آچميش منيمله دانيشيردي. کنديميزين اوست طرفينده کي  اؤروشده آلا اينک ساغ بؤيرو اوستونده اوزانميش، اؤلوردو. آنجاق دانيشا-دانيشا اؤلوردو. گؤزلريني قيرپميردي. ايري گؤزلريندن ياش آخاراق منه «منيم بالامي هارا آپاردين؟ اونو مندن نييه آييردين؟ من آرتيق اونسوز ياشايا بيلمرم. او، منيم سون بالام ايدي. سون دوغوروشوم. بالام...بالام...» دئييردي.  
  يوخودان اويانديم. اللريم تيتره ييردي. يانيمدا آنام هله يوخودا ايدي. بير آز کناردا آتام خورولداييردي. ديشاري چيخديم. هاوا گؤزل، گؤيده سايسيز اولدوزلار پاريلداشيرديلار. آلا اينگيميزين يانينا گئتديم. باشقا اينکلرده اولان راحاتليق آلا اينکده يوخ ايدي. آلا اينگي بير آز تومارلاديم. بوينونو چئويريب منه باخيردي. بئله کدرلي و بدبخت باخيشلارين قارشيسيندا دؤزمک نه قدر ده چتينميش. تکرار گئري دؤنوب آنامين يانيندا اوزانديم. گون دوغموشدو. يئنه دريسي نين ايچينه سامان دولدورولموش بالاسيني آلا اينگين گؤزلري نين اؤنونه قوياراق ساغماغا باشلادي آنام. اينکلري ساغيلديقدان سونرا هاميسيني اؤروشه آپاراجاقديم. آلا اينک يئرييه بيلميردي. آرخادا قالميشدي. ديگر اينکلر کندين هئيوانلارينا قاتيليب اوزاقلارا اوتلاماغا گئتديلر. آلا اينک گئري قالميشدي. تام اورايا چاتميشديق. منيم يوخومدا گؤردويوم يئره چاتميشديق. آلا اينک تام اورايا چاتديغيميزدا ساغ بؤيورونون اوستونده اوزاندي. ياش آخان ايري گؤزلريني منه زيلله ييب جان وئرمه يه باشلادي. اؤلوردو. فيکيرلشديم کي، ايندي يوخومدا گؤردويوم کيمي ديل آچيب دانيشاجاق. آنجاق دانيشمادي. گؤزلري منه زيللنميش شکيلده جان وئردي