سومالييايا يارديم
بؤيوک ماغازانين اؤنونده چوخلو آرابالار دايانميش. ايچيندن گنج قيزلار-اوغلانلار ائنيب اللرينده کي باغلاماني مئيدانين کناريندا اولان دمير بير آنبارين بؤيوک باجاسيندان ايچري آتيرلار. قولتوغونون آلتيندا عصا اولان گنج بير آدام دؤرد ياشلي قيزي نين اليندن توتموش آرابادان ائنير. آرابانين ديگر قاپيسيندان دا بير گنج بايان ائنير. اللرينده کي اشيالارلا آنبارا دوغرو ايره ليله ييرلر. قيزين آتاسينا سوردوغو «آتا، بو يارديملاري ائتديکدن سونرا سنين باجاغين دوزله جکمي؟» سوروسو کناردان هر کس طرفيندن دويولور. قيزين آتاسي دا «دوزله جک قيزيم» جاوابيني وئرير. بو زامان ايکه رلکلري* ايله بو قالاباليغين ايچيندن کئچن باشقا بير آتا ايله 4.4 ياشلي بالا اولايلاري سئير ائديرلر. بالا «آتا، اينسانلار ندن پالتارلاريني او دمير آنبارين ايچينه آتيرلار؟» دئيه سورور. آتا «اوغلوم اونلار سومالييايا يارديم ائديرلر اونا گؤره. آنيمساييرسانمي تئلئویزیوندا گؤرموشدوک؟ سومالييادا بالاجا چوجوقلار آجلاريندان اؤلورلر. آتالار و آنالار آجليقدان اؤلورلر اوردا» جاوابيني وئردي. بالا بير سؤز سؤيله مه دي. سوسدو. دوشوجه لره دالميشدي. دمير آنبارا دولدورولان پالتارلارا باخيردي. آز اؤنجه قيز چوجوغون آتاسينا بو يوللا توسولار2 ديله ديگيني دويموشدو. بير آز دالقينليقدان سونرا آتاسينا دؤنوب «آتا، من سنين داها چوخ ياشاماني ايسته ييرم» دئدي. کيچيک ايکه رلگيندن ائنيب آتاسينا طرف گلدي. آتا دا ايکه رلگي نين آياغيني يئره ايليشديريب بالاسيني قوجاغينا آليب قالديردي. اوغلونو باغرينا باساراق «چوخ ياشاماغا چاليشاجام اوغلوم. سنين اوچون ياشاياجاغام» دئدي. آتاسي نين قوجاغيندا بير سوره دمير آنبارا اللرينده کي باغلامالاري آتانلارا باخديلار. بالا چوخ دالقينجا يئنيدن ايکه رلگينه ميندي. اوردان اوزاقلاشماغا باشلاميشديلار. يايين ايستي گونلري ايدي. فينلاندييانين اورمانليقلاري يامياشيل گؤزلليگي ايله هر طرفي دولدورموشدو. دله لر يوللاردا دانس ائديرديلر. ماوي گؤيلرين درينليگينده قوشلار سوزولوب گئديردي. آتا ايله بالا اورمانليقلارين درينليکلرينده اوخويا-اوخويا ايکه رلک سوروردولر. بالا، کيچيک ايکه رلگي ايله يوخوشلاري چيخاماديغيندا، يا دا يورولدوغوندا، آتا بالاسي نين ايکه رلگيني اينجه قيريلماز ايپله آرخادان اؤز ايکه رلگينه باغلاييب سوروردو. بؤيله ليکله ده اورمانليغين داها چوخ اوزاق يئرلرينه گئده بيليرديلر. آرا- سيرا نوکيا کيمي ياخين باشقا شهره ده ايکه رلکله گئديرديلر. او گونو آخشاما قدر ايکه رلک سوردولر اورمانلقيلاردا. ائوه دؤندوکلرينده بالا دالقين گؤرونوردو. ائوين اؤنونده ايکه رلکلريني آولوداکي3 ايکه رلکلره اؤزل يئره باغلاييب ائوه گيرديلر. ت و-ده خبر ايزلرکن يئنه ده سومالييانين آج چوجوقلاري گؤستريليردي. بالا بونلاري ايزله ديکدن سونرا داها دا دالقينجا گؤرونوردو. خبرلره باخديقدان سونرا يئنه ده قوشوب آتاسي نين بوينونا ساريلاراق «آتا، من سنين چوخ ياشاماني ايسته ييرم. ايستميرم سن اؤله سن، سن اؤلسن من داريخارام، آغلارام، چوخ اوزوله رم» دئدي. آتا اوغلونو بوينونا آليب ائوين ديوارينداکي گوزگونون اؤنونه کئچدي و «منيم سئويملي اوغلوم، بير يئرده ياشاياجاغيق. من ده چوخ ياشاماق و سنين اوغورلاريني گؤرمک ايسته ييرم» سؤيله دي. آتا بالاسي نين دالقينليغيني اورتادان قالديرماق اوچون اوغلو ايله اويناماغا باشلادي. کيچيک ائوده آتا ايله بالانين موتلولوغو دالغالانيردي. کيچيک بالا گيزله نير و آتا اونو آختاريب تاپيردي. ساعاتلار ايره ليله ميش و آرتيق ياتماق زاماني گلميشدي. آتا، کيچيک اوغلونو قوجاغينا آليب اونا ناغيللار دئييب اويوتماغا چاليشيردي. ناغيل سونا اَرَنه قدر چوجوق گؤزلريني يوموب ياتميشدي. آتا چيراقلاري سؤندوروب بيلگيساياري نين اؤنونده اوتوردو. بيلگيساياردا بير شئيلر اوخويوردو. ايکي ساعاتا قدر زامان کئچميشدي. بيردن اوغلو آغلاياراق يوخودان اوياندي. آتا قوشاراق اوغلونو قوجاغينا آليب «اوغلوم نه اولدو، نييه آغلاييرسان؟» سوردو. چوجوق بير شئي سؤيله مه دن آغلاييردي. آتا چوجوغو قوجاغينا آليب ائوين ايچينده گزديرمه يه باشلادي. چوجوق آغلاماسيني بير تورلو دوردوراراق آتاسينا «من ده سوماليياداکي آج چوجوقلارا يارديم ائتمک ايسته ييرم» دئدي. سويدوجويا دوندورما آليب قويمويشدولار چوخلو. آتاسي نين قوجاغيندان ائنيب سويدوجونون قاپيسيني آچيب دوندورمالاري چيخاردي. اون دوندورما وار ايدي. آرتيق آغلاماسيني بيتيرميشدي و جيدي بير ايش گؤرمک ايسته ييردي سانکي. «آتا، بونون بيري سنين، بيري ده منيم. قالانيني گؤنده رک سوماليياداکی آج چوجوقلارا» دئدي. آتانين گؤزلري دولموشدو. اوغلونون بؤيله اينسان سئورليک حيسسلري اونو دويقولانديرميشدي. اوغلونو باغرينا باسيب اؤپدو و «اوغلوم، دوندورمالار اورایا گئديب چاتانا قدر ارييه ر. باشقا شئي گؤندرمه لي یيک. کؤهنه پالتارلاريميزي گؤندره بيله ريک» سؤيله دي. بالا قوشاراق پالتار دولابي نين قاپيسيني آچدي و «منيم اسکي پالتارلاريمي گؤنده رک. آرتيق من بؤيوموشم اَينيمه اولمور اونلار» دئدي و پالتارلاريني دولاپدان چيخارماغا باشلادي. آتا دا اونا يارديم ائديردي. بير توربا پالتار حاضيرلاديلار. بالا بير توربا پالتار حاضيرلانديقدان سونرا اؤزونو چوخ راحات حيسس ائديردي. آتا «اوغلوم، بونلاري يارين آپاريب يارديم آنبارينا آتاريق» دئدي. بالا ايسه قبول ائتمه دي و «يوخ، ايندي آپارماق ايسته ييرم. ايندي آپاراق آتاق گلک» سؤیله دی. پالتارلاريني گئيينيب ديشاري چيخديلار. گون باتماميش کيمي ايدي. فينلاندييانين بياض گئجه لرينده گؤيلرين درينليگينده آي و اولدوزلار پارلاييرديلار. بالا چوخ موتلو ايدي. يارديم تورباسي نين آتيلاجاغي يئر بير آز اوزاقدا اولدوغو اوچون ايکه رلکله گئده جکديلر. ايکه رلکلرينه مينيب يولا دوشدولر. آتا تورباني اؤز ايکه رلگي نين آرخاسينا باغلاميشدي. مئيداندا کيمسه يوخ ايدي. دمير يارديم آنباري نين اؤنونده ايکه رلکدن ائنديلر. آتا، بالاسيني بوينونا مينديردي و تورباني وئردي کي، آنبارين ايچينه آتاسيین. بالا تورباني آنابارين ايچينه آتدي. آنبار دولماق اوزره ايدي کؤهنه پالتارلارلا. بالا، تورباني آتديقدان سونرا «آتا، بوراخ مني» دئدي. باشلادي مئيدانا اويناماغا. بالا، يوکسک سسله «آتام چوخ ياشاياجاق، ياشاسين سومالييانين آجلاري» سؤيله ييب اويناماغا باشلادي. بالانين سسي گئجه نين سسسيزليگيني قيريردي. گئري دؤندوکلرينده بالا، چوخ راحاتجا يوخويا دالدی.
08.10.2011
Hiç yorum yok:
Yorum Gönder